أزمة مجمع السيارات يوم الخميس
كل يوم خميس لازم يكون في أزمة ولازم يكون في فوضى .. المجمع تبع السيارات بيكون مليان ناس طلاب عمال وموظفين الكل بدو يروح ع بلده ع الشمال او ع الجنوب بس المشكلة مش هون، يخلف ع رام الله الي واسعة كل هالعالم، المشكلة انو بتيجي حجة الظهر ع مجمع السيارات وطبعا بيكون في شباب وعالم بيستنوا بالسيارات، اول ما بتيجي السيارة كل العالم بتنط جواها والحجة واقفة محل ما هي مش (مسترجية) تقدم ع السيارة عشان ما تنفغص بينهم، لا والمصيبة انو ما بتوقف الأمور على هيك، بيصير الكل يصوت والكل بدو يعمل مشاكل مع الكل .. والشاطر الي بيعمل مشاكل أكثر .. وبيصير الكل مستعجل ع الترويحة .. ع اساس انو الوزارة بتستنى فيه هناك .. و ع اساس انو باقي الناس مروحين عشان يعملو ازمة وبس .. يعني بيكون شايف انو هو الوحيد الي الو الحق انو يطلع باول سيارة جاية ... حتى لو كان اخر واحد اجا ع المجمع ...
ويا ريت بس هيك .. بيكون السمسار الي هو مفروض بينظم السير حاجز لقرايبه ومعارفه اول سيارة جاية ع الخط .. حرام عشان ما يستنوا بالمجمع .. او اشخاص ثانيين مقابل مبلغ معين بيتفق معاه عليه .. وبيزبطه وخلص ..فبتيجي السيارة ع المجمع وما بترضى تركب حدا ليش .. ؟؟ كلو محجوز .. والناس بالمجمع بيتسفطوا فوق بعض .. وفوق الزبالة الي بتكون بارضية المجمع ..
أو بيجيك السمسار الي بيكون بالمجمع وبيحكي انو في باص ع الخليل او ع بيت لحم .. وبيكون متفق مع سواق الباص ع مبلغ معين مقابل هالخدمة .. طبعا رح يطلعو ع حساب الركاب لانو بالنهاية سواق الباص بدو يرفع الاجار ومش بعيد يحمل ركاب زيادة .. عشان بالاخر يغطي المبلغ الي دفعوا للسمسار.
يعني من الاخر استغلال.. ومصاري بتروح من ايد لايد .. وطبعا كلها من جيبة الراكب ..
لا وبعض الشوفيرية ... بيحاولو يستغلو الموضوع .. يعني بيجيك واحد من تبعين سيارات ابو ديس بيحكيلك .. انا باخدكم ع الخليل مثلاً .. بس بشرط .. بدل 27 شيكل باخد منكم .. 35 .. والي بدو بدو والي ما بدو ... يضرب راسو باكبر حيط .. بتيجي عليه بتحكيلو طيب ليش يوم الخميس بيكون في تنسيق والشرطة ما بتخالف الناس الي بيمشو ... ع غير خطهم ... بيدير وجهه وبيحكيلك ما انا بدي ارجع ع رام الله فاضي (مع العلم انو بيكون من الخليل بس عشان ياخد كمان شوية مصاري) .. يعني انا لازم ادفع الي فوقي والي تحتي .. وادفع سعر الطريق مرتين ... حتى اصل البلد.. مع العلم انو نفس الشوفير في الايام الثانية بيكون يترجى في الراكب رجا يطلع معاه ...
ما علينا المهم بتطلع من المجمع في سيارة هيك ولا هيك وبتمشي .. وكل الي صار كوم والي بدو يصير من هون وطالع كوم ثاني .. ازمة شارع الفرندز .. والارسال .. حسب وجهتك .. كل ربع ساعة بتتحرك 10 متر .. وبطلوع الروح بتتعدى الازمة .. طبعا لسة ما وصلنا ازمة قلنديا ... فما بدنا نحكي عنها
هي المشكلة وعرضناها ... واعتقد مش محتاجين نعمل اي اشي عشان نشوفها غير انا نمشي بنص رام الله يوم خميس .. بس السؤال وين المسؤولين يشوفوا حل .. ليش ما يزيدوا عدد السيارات الي بالمجمع الي ع المناطق الي عليها حركة والي بيصير فيها ازمة ... بالمقابل ليش الازمة بتصير برا المجمع .. يعني نزيد السيارات وبنفس الوقت نقلل الازمة الي برا.. السيارات الي بيكونو صافين ع جنب الطريق قرب المجمع لازم يبعدو ..ويصفو بعيد .. برضو ليش ما يكون في رقابة ع السمسار الي بيكون بالمجمع...
المشكلة بدها حل من جذوووووورها ..
أنس أبو عريش
الله يكون بعونكم ..
بس باعتقادي زيادة عدد السيارات مش حل !
لانو الازمة زي ما فهمت ما بتكون الا الخميس
وباقي الايام بشحدوا بركاب !
كل الشوفرية معترضين على عدد الركاب بالسيارة
شو بصير لو رفعو عدد الركاب لـ8 مثلا !
حل شخصي ..
احجز انت وزملائك زي ما الاغلب بعملوا :)